Wednesday, July 22, 2009

ಆ ಬಿಕ್ಕಳಿಕೆಯ ಸದ್ಧು ನಿನಗೆ ಕೇಳಿಸುವುದೇ ಇಲ್ಲ.

ಇದ್ದಕ್ಕಿದ್ದಂತೆ ಮನಸ್ಸಿಗೆ ಕತ್ತಲು ಆವರಿಸಿ ಬಿಡುತ್ತೆ. ಅತಂತ್ರ ಅನ್ನುವಂತ ಸ್ಥಿತಿ. . ಹಾಡುಗಾರನಿಗೆ ಹಾಡುತ್ತಿರುವಾಗಲೇ ಒಂದೆರೆಡು ಸಾಲುಗಳು ಮರೆತಂತೆ . ಆ ಸಾಲುಗಳನ್ನ ನೆನಪಿಸಲು ಪ್ರಯತ್ನಿಸುತ್ತೇನೆ ಪರದೆಯ ಬದಿಗೆ ಸರಿದು.ನಿನ್ನ ಬಗೆಗಿನ ಪ್ರೀತಿ ಪ್ರೇಮ ವಿರಹ ಸಿಟ್ಟು ಪ್ರತಿಯೊಂದನ್ನೂ ಬಚ್ಚಿಟ್ಟ ಕಡೆ ಆ ಸಾಲುಗಳನ್ನ ಹುಡುಕುತ್ತೇನೆ .ಒಂದೇ ಒಂದು ಸಲ ನಿನ್ನನ್ನ ನೋಡಿಬಿಡಬೇಕೆಂಬ ಹಂಬಲ ಜಾಸ್ತಿಯಾಗುತ್ತಾ ಹೋಗುತ್ತೆ. ನಿನ್ನ ನೋಡಿದರೇನೆ ನಿನ್ನ ಕಣ್ಣಿಂದ ಹುಟ್ಟುವ ಆ ಸಾಲುಗಳು ನನ್ನ ನಾಲಿಗೆ ಸವರುವುದಂತೆ. ಏನು ಮಾಡಲಿ ಪ್ರೀತಿ ಎಂಬ ಮೊದಲ ನಿಲ್ದಾಣದಿಂದ ಅವಮಾನಕರವಾದ ನೋವಿನ ಕಣ್ಣೀರನ್ನ ಒರೆಸುವ ನೆಪದಲ್ಲಿ ಮುಖವನ್ನೆ ಕರವಸ್ತ್ರದಲ್ಲಿ ಮುಚ್ಚಿಕೊಂಡು ಇನ್ನೊಂದು ನಿಲ್ದಾಣಕ್ಕೆ ಬಂದು ಕುತಿದ್ದೇನೆ. ಅದೆಷ್ಟು ಹೊತ್ತು ಕೂತಿದ್ನೋ ಗೊತ್ತಿಲ್ಲ. ತಲೆಯೆತ್ತಿ ನೋಡಿದಾಗ ಆ ನಿಲ್ದಾಣದಲ್ಲಿ ವಾಹನಗಳು ಇರಲಿಲ್ಲ ಓಡಾಡೋದು ಯಾವತ್ತೋ ನಿಲ್ಲಿಸಿಬಿಟ್ಟಿದ್ದವು. ಇವತ್ತು ನನ್ನ ಒಬ್ಬೊಂಟಿತನಕ್ಕೆ ಸಂಗಾತಿಯಾಗಲು . ಆ ನಿಲ್ದಾಣ ನನ್ನನ್ನ ಸಂತೈಸುತ್ತಿದೆ. ನಿನ್ನನ್ನ ನೆನಪಿಸುತ್ತಿದೆ. ಸಧ್ಯಕ್ಕೆ ನನ್ನಲ್ಲಿ ನಿನ್ನೆಡೆಗೆ ಪ್ರೀತಿ ಪ್ರೇಮ ವಿರಹ ಕೋಪ ಸಿಟ್ಟು ಇದ್ಯಾವುದೂ ಇಲ್ಲ ದೇವಕಿ. ಈ ನಿಲ್ದಾಣ ಅವೆಲ್ಲವನ್ನೂ ತಣ್ಣಗೆ ಮಾಡಿ ನನಗೋಸ್ಕರ ಒಂದು ಬಸ್ಸನ್ನ ಕರೆಸಿ ಕೈ ಹಿಡಿದು ಕೂರಿಸಿ ಬಿಟ್ಟಿದೆ.

ಬಸ್ಸನ್ನೇರಿ ಕುಳಿತವನಿಗೆ ಎಲ್ಲಿಗೆ ಹೋಗಬೇಕು ಅಂತ ತಿಳಿಯದೇ ದೇವಕಿಯ ಊರು ಅಂದು ಕಂಡಕ್ಟರ್ ಹತ್ತಿರ ಬೈಸಿಕೊಂಡೆ. ಅಕ್ಕಪಕ್ಕದವರೆಲ್ಲ ಕಿಸಕ್ಕಂತೆ ನಕ್ಕರಾದರೂ ನನ್ನ ಮುಖದಲ್ಲಿದ್ದ ನೋವು ಅವರಿಗೂ ತಿಳಿಯುತು ಅನ್ನಿಸುತ್ತೆ ಸುಮ್ಮನಾದರು.
ಅಲ್ಲಿದ್ದವರೆಲ್ಲ ತುಂಬಾ ನಗುತ್ತಿದ್ದರು. ನನಗೆ ಈಗೀಗ ನಗು ಅಂದ್ರೆ ಏನು ಅನ್ನೋದು ಮರೆತು ಹೋಗಿದೆ ಆದ್ದರಿಂದ ಅದ್ಯಾವುದಕ್ಕೂ
ಪ್ರತಿಕ್ರಯಿಸದೆ ಸುಮ್ಮನೆ ನಿನ್ನ ನೋಡುವ ಹಂಬಲದಿಂದ ಹಾದಿಯುದ್ದಕ್ಕೂ ನಿನ್ನನ್ನ ಧ್ಯಾನಿಸುತ್ತ ಮುಂದೆ ಸಾಗುತ್ತಿದ್ದೇನೆ. ಬಸ್ಸು ನಿಧಾನವಾಗಿ ಚಲಿಸುತ್ತಿದೆ. ಆದರೆ ನಿನ್ನನ್ನ ನೋಡುವ ನನ್ನ ಹಪಹಪಿಯ ವೇಗಕ್ಕೆ ಬಸ್ಸು ತನ್ನ ವೇಗವನ್ನ ಇನ್ನಷ್ಟು ತಗ್ಗಿಸುತ್ತ ಒಳಗೊಳಗೆ ಕಿರುನಗುವೊಂದಿಗೆ ಅಣಕಿಸುತ್ತಿದೆ . ಈಗ ಇನ್ನೊಂದು ನಿಲ್ದಾಣದಲ್ಲಿದ್ದೇನೆ ಬಸ್ಸು ನಿಂತಿದೆ. ಎಲ್ಲರಿಗಿಂತ ಮೊದಲಿಗನಾಗಿ ಇಳಿಯೋಕೆ ಹೋದ ನನಗೆ ಕೆಟ್ಟದಾಗಿ ಕಂಡಕ್ಟರ್ ಬೈದು ಬಿಟ್ಟ. ಇನ್ನೂ ಮೂರು ಸ್ಟಾಪಿದೆ ಕುಳಿತುಕೊಳ್ರಿ ಅಂದು ಗದರಿಬಿಟ್ಟ. ಬಸ್ಸು ನಿಧಾನಕ್ಕೆ ಚಲಿಸಲಾರಂಬಿಸಿದೆ.

ಪಕ್ಕದಲ್ಲಿಯೇ ನನ್ನಮ್ಮನ ಹಾಗಿದ್ದ ಯಾರದೋ ತಾಯಿ ಕುಳಿತು ನನ್ನನ್ನೇ ನೋಡುತ್ತಿದ್ದಾಳೆ. ತಾನು ಮಕ್ಕಳನ್ನ ಪ್ರೀತಿಸಿದ ಬಗೆಯನ್ನ ಮಕ್ಕಳು ತಾಯಿಗೆ ಬಗೆದ ದ್ರೋಹವನ್ನ ಬಿಡಿಬಿಡಿಯಾಗಿ ಹೇಳುತ್ತಿದ್ದರೂ ನನಗೆ ತಾಯಿಯ ಪ್ರೀತಿ ಅರ್ಥವಾಯಿತಾದರೂ ಕೊನೆಗೆ ಆ ತಾಯಿ ಬಳಸಿದ ದ್ರೋಹ ಅನ್ನುವ ಶಬ್ಧ ನನಗೆ ಅರ್ಥವಾಗಲಿಲ್ಲ. ನಿನ್ನ ಪ್ರೀತಿಸಿದ ನನಗೆ ಪ್ರಪಂಚದ ಯಾವ ಕೆಟ್ಟ ಸಮಾಚಾರಗಳೂ ಕೆಟ್ಟ ಶಬ್ಧಗಳು ಅರ್ಥವಾಗುವುದಿಲ್ಲ. ನೀನು ನನ್ನ ಮಗನ ಹಾಗೆ ಇದ್ದೀಯಪ್ಪ ಅಂದಳು. ಆ ಕ್ಷಣಕ್ಕೆ ತುಂಬಾ ಹಿತವೆನಿಸಿತಾದರೂ ಮುಂದಿನ ನಿಲ್ದಾಣದಲ್ಲಿ ಆ ತಾಯಿ ಇಳಿಯಬೇಕಾದ್ದರಿಂದ ಮುಂದೆ ಕಾಡುವ ಒಂಟಿತನದ ಭಯದಿಂದ ಆ ತಾಯಿಗೆ ಯಾವ ಪ್ರತಿಕ್ರಿಯೆಯನ್ನೂ ತೋರಿಸದೇ ಕಿಟಕಿಯಾಚೆ ತಲೆ ಹಾಕಿ ಕುಳಿತುಬಿಟ್ಟೆ. ತಾಯಿ ಹೃದಯ ಅದೆಷ್ಟು ನೊಂದುಕೊಂಡಿತೋ. ಅಷ್ಟರಲ್ಲಿಯೇ ಮತ್ತೊಂದು ನಿಲ್ದಾಣದಲ್ಲಿ ಕೆಲವು ಯಾತ್ರಿಗಳು ಇಳಿದರು. ಯಾರೋ ಬಂದು ಇಳಿದವರನ್ನ ತಬ್ಬಿಕೊಂಡರು, ಸಂತೈಸಿದರು ನಕ್ಕರು ಅದೆಲ್ಲವನ್ನ ನೋಡಿ ಈ ಪ್ರಪಂಚದಲ್ಲಿ ನಾನೊಬ್ಬನೇನ ಒಂಟಿ ಅನ್ನಿಸಿದ್ದು ಸುಳ್ಳಲ್ಲ .. ನಿನ್ನೂರಿನ ನಿಲ್ದಾಣಕ್ಕೆ ಇನ್ನೂ ಎರಡು ಸ್ಟಾಪಿದೆ ಅಂತೆ.

ಬಸ್ಸೊಳಗೆ ಕೆಲವೇ ಕೆಲವು ಜನಗಳಿದ್ದಾರೆ. ಯಾಕೋ ಎಲ್ಲರೂ ತುಂಬ ನೊಂದುಕೊಂಡವರಂತೆ ಕಾಣಿಸುತ್ತಿದ್ದಾರೆ. ಪಾಪ ಎಲ್ಲರೂ ಪ್ರೀತಿ ಕಳೆದುಕೊಂಡವರಿರಬೇಕು. ಅವರಿಗೆ ಯಾರು ಇಲ್ಲವೆಂದೆನಿಸುತ್ತಿದೆ. ಇನ್ನೇನು ನಿನ್ನೂರು ಕೇವಲ ಎರಡು ನಿಲ್ದಾಣದಾಚೆ ಅಂದುಕೊಂಡ ಈ ಹೃದಯ ಬಲವಂತದ ನಗುಮುಖ ಹೊತ್ತು ನಗುತ್ತಿದೆ. ಅಲ್ಲಿರುವ ಎಲ್ಲಿರಿಗಿಂತಲೂ ನಾನೆ ಸುಖಿ ಅಂದುಕೊಂಡು ಎಲ್ಲರನ್ನೂ ನೋಡುತ್ತೇನೆ ಒಂತರ ಹೆಮ್ಮೆಯೆನಿಸುತ್ತಿದೆ. ನಿನ್ನೂರು ಹತ್ತಿರವಾಗುತ್ತಿದೆ. ಒಳಗೊಳಗೆ ನನಗೇ ಅಂತ ಒಂದು ಜೀವ ಇದೆ ಅನ್ನುವ ಶಬ್ಧ ನನಗೇ ಕೇಳಿಸುತ್ತಿದೆ. ಬಸ್ಸು ನಿಲ್ಲುತ್ತದೆ. ಬಸ್ಸಿನ ಒಳಗಿದ್ದವರ ಮುಖಗಳೆಲ್ಲ ಅರಳುತ್ತವೆ. ಅಲ್ಲಿ ಇಳಿದವರನ್ನೆಲ್ಲ ಯಾರೊ ಬಂದು ತಬ್ಬಿಕೊಳ್ಳುತ್ತಿದ್ದಾರೆ. ನಾವಿದ್ದೀವಿ ಅನ್ನುವ ಮಾತುಗಳನ್ನಾಡುತ್ತಿದ್ದಾರೆ. ಅದೆಲ್ಲವೂ ನನಗೆ ಕೇಳಿಸುತ್ತಿದೆ.
ನಿನ್ನೂರಿನ ನಿಲ್ದಾಣ ಇನ್ನೊಂದು ಸ್ಟಾಪಿದೆ...

ತುಂಬಾ ಕುಷಿಯಾಗಿದ್ದೀನಿ. ತುಂಬಾ ದಿನಗಳ ನಂತರ ನಿನ್ನ ಎದೆ ಬಡಿತವನ್ನ ಕಿವಿಯಾರೆ ಕೇಳುವ ಅಪೂರ್ವ ಅವಕಾಶ ನನ್ನದಾಗಲಿದೆ. ನನ್ನೆಲ್ಲ ನೋವುಗಳು ಕರಗುವ ಸಮಯ ಕೇವಲ ಕೆಲವೇ ನಿಮಿಷಗಳ ದೂರದಲ್ಲಿದೆ. ಇನ್ಯಾವತ್ತೂ ನಾನು ಅಳಬಾರದು ನೋಯಬಾರದು. ಜಗತ್ತಿನಲ್ಲಿರುವ ಅತ್ಯಂತ ಸಂತೋಷದಿಂದಿರುವ ವ್ಯಕ್ತಿ ಈ ವಾಸು ಆಗಬೇಕು ಅಂದುಕೊಂಡು ಮುಂದೆ ಮುಂದೆ ನೊಡುತ್ತಾ ಹೋಗುತ್ತಿದ್ದೇನೆ. ನಿನ್ನ ನೆನಪು ಮಂಪರಾಗಿ ನನ್ನ ಆವರಿಸ್ಕೊಂಡುಬಿಡ್ತು.. ಆ ಮಂಪರಿನಲ್ಲಿ ಬರೀ ನಿನ್ನುಸಿರ ಗಝಲುಗಳೇ .

ಬಸ್ಸು ನಿಂತಿದೆ ನಿನ್ನೂರು ಸ್ಟಾಪು ಅಂದುಕೊಂಡೆ. ಕಂಡಕ್ಟರ್ ಕೆಟ್ಟದಾಗಿ ಕಿರಿಚಾಡಿದ. ಅದೆಷ್ಟೊ ಸರ್ತಿ ಕೂಗಿದ್ನಂತೆ, ತಟ್ಟಿದ್ನಂತೆ ಹೆಸರು ಗೊತ್ತಿಲ್ಲದೆ ಒಹೋಯ್ ಅಂದ್ನಂತೆ, ಕಿವಿಯ ಹತ್ತಿರ ಕೂ.. ಅಂದ್ನಂತೆ. ಕ್ಷಮಿಸು ನಿನ್ ಮೇಲೆ ಆರೋಪ ಮಾಡ್ತಿಲ್ಲ. ಅಷ್ಟು ಆವರಿಸಿಕೊಂಡಿದ್ದೆ ನೀನು. ಬಸ್ಸು ಇನ್ನೂ ನಿಂತಿತ್ತು. ದೇವಕಿ ಊರು ಇದೇನಾ ಅಂತ ಕೇಳಿದೆ. ಬಸ್ಸಿನ ಎದುರುಗನ್ನಡಿಗೆ ರಭಸವಾಗಿ ನೀರು ಬಿತ್ತು. ಎದುರುಗಡೆಯಿಂದ ಕ್ಲೀನರ್ ದೊಡ್ಡ ಡಬ್ಬದಿಂದ ನೀರೆರೆಚುತ್ತಿದ್ದ. ಬಸ್ಸು ಒಂದು ನದಿಗೆ ಅರ್ದ ಇಳಿದು ನಿಂತಿತ್ತು. ಡ್ರೈವರ್ ಕಂಡಕ್ಟರ್ ಕ್ಲೀನರ್ ನಾಳೆಗೆ ಬಸ್ಸನ್ನ ಸಿದ್ಧಮಾಡುತ್ತಿದ್ದರು. ಆ ನದಿಯಾಚೆ ಯಾವ ಮಾರ್ಗಗಳೂ ಇರಲಿಲ್ಲ. ನನ್ನಾಸೆಯ ನಿನ್ನೂರಿಗೂ ಕೂಡ.

ಹರಿಯುತ್ತಿರುವ ನೀರ ಮದ್ಯೆ ನಿಂತ ಬಂಡೆಗಲ್ಲು ಆತ್ಮೀಯವಾಗಿ ಕೈಬೀಸಿದ ಹಾಗಾಯ್ತು.

ಬೆಳದಿಂಗಳು ನಿಧಾನಕ್ಕೆ ವಿರಹದ ಗೀತೆಯನ್ನ ಹಾಡುತ್ತಾ ಹೆಜ್ಜೆ ಹಾಕುತ್ತಿರುವಾಗಲೇ
ಎಲ್ಲಿ ಜಾರಿತೋ ಮನವೂ ಎಲ್ಲೆ ಮೀರಿತೋ
.....
....
ಬಾನಿನಲ್ಲಿ ಒಂಟಿತಾರೆ ಸೋನೆ ಸುರಿವ ಇರುಳ ಮೋರೆ
ಕತ್ತಲಲ್ಲಿ ಕುಳಿತು ಒಳಗೆ ಬಿಕ್ಕುತಿಹಳುಯಾರೋ ನೀರೆ
.....
ಪ್ರೀತಿಯ ಕವಿ ಭಟ್ಟರು ಬರೆದ ಬಿಕ್ಕಳಿಕೆಯ ಈ ಸಾಲುಗಳಲ್ಲಿ ಬಿಕ್ಕುತಿರುವಳು ಆ ನೀರೆ ಮಾತ್ರವಲ್ಲ.. ನಿನ್ನೂರಿನ ದಾರಿ ತಲುಪಲಾರದೇ ಈ ವಾಸು ಕೂಡ ಬಿಕ್ಕುತ್ತಿದ್ದಾನೆ. ಆದರೂ ಆ ಬಿಕ್ಕಳಿಕೆಯ ಸದ್ಧು ನಿನಗೆ ಕೇಳಿಸುವುದೇ ಇಲ್ಲ.
ಹಾಡುಗಾರ ಮರೆತು ಹೋದ ಹಾಡಿನ ಸಾಲುಗಳು ನೆನಪಿಗೆ ಬರುತ್ತಲೇ ಇಲ್ಲ.
ನೀನು ನನ್ನ ಮರೆತಂತೆ.

6 comments:

  1. vasu, ninna bavanegalondige nanna bavagalannu
    mareyuthidene. hadugara salugalannu maretante.
    NICE FEEL...........

    ReplyDelete
  2. Vasu,

    Instead of feeling depressed and sad, you should start thinking laterally. You know Devaki for so long, do you think that she can really betray you? At least you should start probing into things now.

    Vinu Balanja,
    I personally feel that you are dragging a bit too much. I know that you are planning a mega serial, but at the same time you should also try to retain viewer's interest. If you try to summarize the events from past 4-6 weeks all that you can say is Devaki came out of Yashoda's house and she is living in a rented house. The serial is moving in snail pace.
    Please show the names of actors along with their character names.

    Finally can someone answer me the real names of these characters in the serial
    Raghu(Yashoda's husband)
    Hotel owner (Devaki's father)

    Happy watching!

    ReplyDelete
  3. hai...it's supper

    ReplyDelete
  4. vasu,

    u r doing such a superb role n ur way of expressing d feelings are speechless.

    Thanks to vinu balanja n team for such a good serial.I request mr.vinu balanja to not to drag this serial.till today devaki hasn't told d reason to padma(SIL)for becomming surrogate mother n padma also dint asked.all r awaiting for who will lookafter devaki's child? plz proceed d JOGULA story without dragging.

    ReplyDelete
  5. waaw such a wonderfull feelings...

    ReplyDelete
  6. ಬಳಂಜ ಅವರಿಗೆ ಪ್ರೀತಿಯ ನಮಸ್ಕಾರ.

    ಬ್ಲಾಗ್ ಚನ್ನಾಗಿದೆ. ಅಷ್ಟೇ ಹೇಳೋಕ್ ಆಗ್ತಿರೋದು. ವಾಸುಗೆ ಬೇಗ ಜೊಗುಳ ಹಾಡಿಸಿ

    ರಮೇಶ್.ಬಿ

    ReplyDelete